CRECT Education

Class 7 Kannada Lesson 7: Stories of Nasiruddin | KTBS Second Language – Practice & Quiz

Description

Practice Class 7 Kannada Lesson 7 — Stories of Nasiruddin (ನಸಿರುದ್ದೀನನ ಕತೆಗಳು) from the KTBS Second Language textbook.

ಗದ್ಯ (prose) · ಪ್ರಕಾಶ ಕಂಬತ್ತಳ್ಳಿ

ಪಠ್ಯFull text

**೧. ಕತ್ತೆಯ ಮಾತು** ನಸಿರುದ್ದೀನನ ಬಳಿ ಒಂದು ಸುಂದರವಾದ ಕತ್ತೆ ಇತ್ತು. ಅವನು ಅದನ್ನು ಯಾರಿಗೂ ಕೊಡಲು ಇಷ್ಟಪಡುತ್ತಿರಲಿಲ್ಲ. ಆದರೂ ಒಂದು ದಿನ ನೆರೆಯವ ಕೇಳಿದ. “ಕೆಲವು ಸಾಮಾನು ಸಾಗಿಸಬೇಕಾಗಿದೆ, ನಿನ್ನ ಕತ್ತೆ ಕೊಡುವೆಯಾ?” “ಇಲ್ಲ ಮಿತ್ರ, ಈಗ ನನ್ನ ಬಳಿ ಯಾವ ಕತ್ತೆಯೂ ಇಲ್ಲ” ಎಂದ ನಸಿರುದ್ದೀನ್. ಪರಿಪರಿಯಾಗಿ ಕೇಳಿಕೊಂಡರು ನಸಿರುದ್ದೀನ್ ತನ್ನ ಬಳಿ ಕತ್ತೆ ಇಲ್ಲಾ ಎಂದೇ ವಾದಿಸಿದ. ಮಿತ್ರ ಇನ್ನೇನು ಹೊರಡಬೇಕು, ಅಷ್ಟರಲ್ಲಿ ಮನೆಯಲ್ಲಿದ್ದ ಕತ್ತೆ ಜೋರಾಗಿ ಅರಚಿಕೊಂಡಿತು. (Illustration of Nasiruddin talking to his neighbor while a donkey brays from inside the house) ನೆರೆಮನೆಯಾತ “ಏನು ದೊಡ್ಡಮನುಷ್ಯರೇ, ಕತ್ತೆ ನಾನಿಲ್ಲಿದ್ದೇನೆ ಅಂತ ಕೂಗಿ ಹೇಳುತ್ತಿದೆಯಲ್ಲಾ” ಎಂದ ವ್ಯಂಗ್ಯವಾಗಿ. ನಸಿರುದ್ದೀನನಿಗೆ ಕೋಪ ಉಕ್ಕಿ ಬಂತು. “ಅಲ್ಲಯ್ಯ ಇಷ್ಟು ದೊಡ್ಡಮನುಷ್ಯ, ನಾನು ಹೇಳುವ ಮಾತಿಗಿಂತ ಕತ್ತೆಯ ಮಾತಿನಲ್ಲಿ ನಂಬಿಕೆ ಹೆಚ್ಚೋ” ಎಂದು ಕೇಳಿದ. * * * **೨. ವಯಸ್ಸು** ಒಂದು ದಿನ ಗೆಳೆಯರ ಗುಂಪಿನಲ್ಲಿ ನಸಿರುದ್ದೀನ್ ಹರಟೆಹೊಡೆಯುತ್ತಿದ್ದ. ಮಾತಿನ ಮಧ್ಯೆ ಸ್ನೇಹಿತನೊಬ್ಬ “ನಸಿರುದ್ದೀನ್ ನಿನ್ನ ವಯಸ್ಸೆಷ್ಟು?” ಎಂದು ಕೇಳಿದ. ನಸಿರುದ್ದೀನ್ ಕೂಡಲೇ “ನಲವತ್ತು ವರ್ಷ” ಎಂದ. ಆದರೆ ಅವನ ಸುಕ್ಕುಗಟ್ಟಿದ ಮುಖ, ಬಿಳಿಯ ಕೂದಲು ನೋಡಿದರೆ ನಲವತ್ತು ವಯಸ್ಸಿನವನಂತೆ ಕಾಣುತ್ತಿರಲಿಲ್ಲ. ಆದ್ದರಿಂದ ಸ್ನೇಹಿತರು ಅವನ ಮಾತನ್ನು ನಂಬಲಿಲ್ಲ. ಅವರಲ್ಲಿ ಒಬ್ಬ ಧೈರ್ಯ ಮಾಡಿ ಕೇಳಿದ. “ಅಲ್ಲಾ ನಸಿರುದ್ದೀನ್, ಹತ್ತು ವರ್ಷದ ಹಿಂದೆಯೂ ನೀನು ಇದೇ ಮಾತು ಹೇಳಿದ್ದು ನನಗೆ ಚೆನ್ನಾಗಿ ನೆನಪಿದೆ. ಈಗಲೂ ನಲವತ್ತು ವರ್ಷ ಎಂದೇ ಹೇಳುವೆಯಲ್ಲಾ?” “ನಾನು ಆಗೊಂದು ಈಗೊಂದು ಮಾತನಾಡುವವನಲ್ಲ. ನನ್ನದು ಯಾವಾಗಲೂ ಒಂದೇ ಮಾತು ಎಂದ ನಸಿರುದ್ದೀನ್.” * * * **೩. ಕಳ್ಳರು ಬಂದರು ನಸಿರುದ್ದೀನನ ಮನೆಗೆ** ಒಂದು ರಾತ್ರಿ ನಾಲ್ಕೈದು ಮಂದಿ ಕಳ್ಳರು ನಸಿರುದ್ದೀನನ ಮನೆಗೆ ನುಗ್ಗಿದರು. ದೂರದಿಂದಲೇ ಇದನ್ನು ಗಮನಿಸಿದ ನಸಿರುದ್ದೀನ್ ಬೀರು ಒಂದರಲ್ಲಿ ನುಗ್ಗಿ ಬಾಗಿಲು ಹಾಕಿಕೊಂಡ. ಕಳ್ಳರು ಮನೆಯನ್ನೆಲ್ಲಾ ಜಾಲಾಡಿದರು. ಏನೂ ಸಿಗಲಿಲ್ಲ. ಆದರೂ ಕಳ್ಳರು ಬಿಡಲಿಲ್ಲ. ಏನಾದರೂ ಸಿಗಬಹುದೆಂದು ಪುನಃ ಮನೆಯನ್ನೆಲ್ಲಾ ಹುಡುಕಿದರು. ಒಬ್ಬ ಕಳ್ಳನಿಗೆ ಬೀರು ಕಣ್ಣಿಗೆ ಬಿತ್ತು. ಖುಷಿಯಾಯಿತು. ಸದ್ಯ ಬೀರುವಿನಲ್ಲಿ ಏನಾದರೂ ಸಿಕ್ಕೇ ಸಿಗುತ್ತದೆ ಎಂದು ಬೀರು ಬಾಗಿಲು ತೆರೆದ. ಅಲ್ಲಿ ನಸಿರುದ್ದೀನ ಮುದುಡಿ ಕುಳಿತಿದ್ದ. “ಅರೇ! ಇಲ್ಲೇನು ಮಾಡುತ್ತಿದ್ದೀಯಾ?” ಕಳ್ಳ ಕೇಳಿದ. (Illustration of a thief opening a cupboard and finding Nasiruddin hiding inside) “ನಿಮಗೆ ನಮ್ಮ ಮನೆಯಲ್ಲಿ ಕದ್ದೊಯ್ಯಲು ಏನೂ ಸಿಗಲಿಲ್ಲವಲ್ಲಾ ; ಅದಕ್ಕೆ ನಾಚಿಕೆಯಾಗಿ ನಿಮಗೆ ಮುಖ ತೋರಿಸಲಾರದೆ ಇಲ್ಲಿ ಬಚ್ಚಿಟ್ಟುಕೊಂಡಿದ್ದೇನೆ ಎಂದ. * * * **೪. ಕತ್ತೆಗೇಷ್ಟು ಬೆಲೆ?** ನಸಿರುದ್ದೀನನ ಕತ್ತೆ ಬರಬರುತ್ತಾ ತೀರಾ ಸೋಮಾರಿಯಾಗತೊಡಗಿತು. ಏನುಮಾಡಿದರೂ ಬದಲಾಗಲಿಲ್ಲ. ಬೇಸತ್ತ ನಸಿರುದ್ದೀನ ಆ ಕತ್ತೆಯನ್ನು ಸಂತೆಗೆ ತೆಗೆದುಕೊಂಡು ಹೋಗಿ ೪೦ ನಾಣ್ಯಗಳಿಗೆ ಮಾರಾಟ ಮಾಡಿದ. ಕತ್ತೆಯನ್ನು ಕೊಂಡವನು ಆ ಕತ್ತೆಯನ್ನು ಇದೇ ಸಂತೆಯಲ್ಲಿ ಮಾರಾಟ ಮಾಡಿಬಿಡಬೇಕೆಂದು ನಿರ್ಧರಿಸಿದ. ಅವನೂ ಅಲ್ಲಿಯೇ ಹರಾಜು ಹಾಕತೊಡಗಿದ. (Illustration of a man auctioning a donkey in a market while Nasiruddin and others watch) ಕತ್ತೆಯ ಒಂದೊಂದೇ ಗುಣಗಳನ್ನು ವರ್ಣಿಸತೊಡಗಿದ. ನೆರೆದಿದ್ದವನೊಬ್ಬ ೫೦ ನಾಣ್ಯಕ್ಕೆ ಕೂಗಿದ. ಅದು ಕೆಲಸ ಮಾಡುವ ರೀತಿ, ಅದರ ಸಾಮರ್ಥ್ಯ ಇತ್ಯಾದಿಗಳನ್ನು ಹೊಗಳತೊಡಗಿದ. ಮತ್ತೊಬ್ಬ ೬೦ ನಾಣ್ಯಗಳಿಗೆ ಕೂಗಿದ. ಕತ್ತೆಯ ಪರಂಪರೆ, ಅದರ ವಂಶಾವಳಿ, ಮುಂದೆ ಇದು ಹಾಕುವ ಮರಿಗಳು ಇತ್ಯಾದಿ ಕತ್ತೆಯ ಗುಣಗಾನ ಮಾಡತೊಡಗಿದ. ಇದನ್ನೆಲ್ಲಾ ನೋಡುತ್ತಾ ನಿಂತಿದ್ದ ನಸಿರುದ್ದೀನನಿಗೆ, ತನ್ನ ಕತ್ತೆ ಇಷ್ಟೆಲ್ಲಾ ಗುಣಗಳನ್ನು ಹೊಂದಿದೆಯೇ ಎಂದು ಆಶ್ಚರ್ಯವಾಯಿತು. ಬೇರಿನ್ನಾರಾದರೂ ಕೊಂಡುಕೊಂಡಾರಂಬ ಆತಂಕದಿಂದ ತಾನೇ ೭೦ ನಾಣ್ಯಗಳಿಗೆ ಹರಾಜು ಕೂಗಿದ. ಅದೇ ಕತ್ತೆಯನ್ನು ಹೊಡೆದುಕೊಂಡು ಮನೆಗೆ ಬಂದ. * * * **ಕೃತಿಕಾರರ ಪರಿಚಯ :** (Portrait of ಪ್ರಕಾಶ ಕಂಬತ್ತಳ್ಳಿ is shown) ಪ್ರಕಾಶ ಕಂಬತ್ತಳ್ಳಿ ಅವರು ದಾವಣಗೆರೆ ಜಿಲ್ಲೆಯ ಹರಪನಹಳ್ಳಿ ತಾಲ್ಲೂಕಿನ ಕಂಬತ್ತಳ್ಳಿ ಗ್ರಾಮದಲ್ಲಿ ೧೯೫೪ ರಲ್ಲಿ ಜನಿಸಿದರು. ನಾಟಕ ಶಾಸ್ತ್ರದಲ್ಲಿ ಬಿ.ಎ. ಹಾಗೂ ಕನ್ನಡದಲ್ಲಿ ಎಂ.ಎ. ಪದವಿ ಪಡೆದಿದ್ದಾರೆ. ಇವರು ಭಾಷಾಂತರಕಾರರಾಗಿ, ಕಥೆಗಾರರಾಗಿ ಹಾಗೂ ವಿವಿಧ ಪ್ರಕಾಶನ ಸಂಸ್ಥೆಗಳಲ್ಲಿ ಸಂಪಾದಕರಾಗಿ ದುಡಿದಿದ್ದಾರೆ. ಇವರು ೧೯೯೫ ರಲ್ಲಿ ಬೆಂಗಳೂರಿನಲ್ಲಿ ‘ಅಂಕಿತ ಪುಸ್ತಕ ಪ್ರಕಾಶನ’ ಸಂಸ್ಥೆಯನ್ನು ಸ್ಥಾಪಿಸಿ, ಹೊಸ ಕಥೆಗಾರರಿಗೆ ಮತ್ತು ಲೇಖಕರಿಗೆ ಪ್ರೋತ್ಸಾಹ ನೀಡುತ್ತಿದ್ದಾರೆ. ಇವರು ‘ಆರದಿರಲಿ ಬೆಳಕು’, ‘ರಂಗವಿಹಾರ’, ‘ಮನಸ್ಸಿಗಷ್ಟು ಮುಖಗಳು’, ‘ಕಂಪ್ಯೂಟರ್ ಸೇವಕ ಮತ್ತು ಇತರ ನಾಟಕಗಳು’, ‘ಅನ್ವೇಷಕರು’ ಮುಂತಾದ ನಾಟಕಗಳನ್ನು ಬರೆದಿದ್ದಾರೆ. ಇವರಿಗೆ ಎಸ್.ವಿ. ಪರಮೇಶ್ವರಭಟ್ಟ ಸಂಸ್ಮರಣಾ ಪ್ರಶಸ್ತಿ ಹಾಗೂ ಕನ್ನಡ ಪುಸ್ತಕ ಪ್ರಾಧಿಕಾರದ ಅತ್ಯುತ್ತಮ ಪ್ರಕಾಶನ ಸಂಸ್ಥೆ ಪ್ರಶಸ್ತಿ ಲಭಿಸಿವೆ. ಪ್ರಸ್ತುತ ಕಥೆಗಳನ್ನು ಇವರ ‘ಮಕ್ಕಳಿಗಾಗಿ ಮತ್ತೆ ಹೇಳಿದ ನಸಿರುದ್ದೀನನ ಕತೆಗಳು’ ಪುಸ್ತಕದಿಂದ ಆರಿಸಲಾಗಿದೆ.

ಅಭ್ಯಾಸexercises from the textbook

Model answers — a guide, not the only correct wording. Check with your teacher.

I. ಪದಗಳ ಅರ್ಥ ತಿಳಿಯಿರಿ :

ಖುಷಿ - ಸಂತೋಷ; ಆನಂದ.
ನೆರೆಯವ - ಸಮೀಪದವ; ಅಕ್ಕಪಕ್ಕದವನು.
ಪರಿಪರಿಯಾಗಿ - ನಾನಾ ವಿಧದಲ್ಲಿ
ವಂಶಾವಳಿ - ಪೀಳಿಗೆ
ಸೋಮಾರಿ - ಮೈಗಳ್ಳತನ; ಆಲಸ್ಯ.
ಜಾಲಾಡು - ಶೋಧಿಸು; ಹುಡುಕು.
ಪರಂಪರೆ - ಕುಲ; ವಂಶ.
ಬೀರು - ಕಪಾಟು
ಸಂತೆ - ವಸ್ತುಗಳನ್ನು ಕೊಂಡುಕೊಳ್ಳುವುದಕ್ಕಾಗಿ ಸೇರುವ ಜನರ ಗುಂಪು.
ಹರಟೆ - ಕೆಲಸಕ್ಕೆ ಬಾರದ ಮಾತು.

II. ಪ್ರಶ್ನೆಗಳು :

ಅ) ಈ ಕೆಳಗಿನ ಪ್ರಶ್ನೆಗಳಿಗೆ ಒಂದು ವಾಕ್ಯದಲ್ಲಿ ಉತ್ತರಿಸಿರಿ.

೧. ನೆರೆಯವನು ನಸಿರುದ್ದೀನನ ಕತ್ತೆಯನ್ನು ಕೇಳಿದ್ದೇಕೆ?
Answer
ನೆರೆಯವನಿಗೆ ಕೆಲವು ಸಾಮಾನು ಸಾಗಿಸಬೇಕಾಗಿದ್ದರಿಂದ ಅವನು ನಸಿರುದ್ದೀನನ ಕತ್ತೆಯನ್ನು ಕೇಳಿದನು.
೨. ಕತ್ತೆ ಅರಚುವುದನ್ನು ಕೇಳಿದ ನೆರೆಯವನು ನಸಿರುದ್ದೀನನಿಗೆ ಏನೆಂದು ಹೇಳಿದನು?
Answer
ನೆರೆಯವನು ಕತ್ತೆ ನಾನಿಲ್ಲಿದ್ದೇನೆ ಅಂತ ಕೂಗಿ ಹೇಳುತ್ತಿದೆಯಲ್ಲಾ ಎಂದು ವ್ಯಂಗ್ಯವಾಗಿ ಹೇಳಿದನು.
೩. ನಸಿರುದ್ದೀನನು ತನಗೆ ಎಷ್ಟು ವಯಸ್ಸಾಗಿದೆ ಎಂದನು?
Answer
ನಸಿರುದ್ದೀನನು ತನಗೆ ನಲವತ್ತು ವರ್ಷ ವಯಸ್ಸಾಗಿದೆ ಎಂದನು.
೪. ನಸಿರುದ್ದೀನನ ವಯಸ್ಸಿನ ಬಗ್ಗೆ ಆತನ ಸ್ನೇಹಿತರಿಗೆ ಅನುಮಾನ ಏಕೆ ಬಂತು?
Answer
ಅವನ ಸುಕ್ಕುಗಟ್ಟಿದ ಮುಖ ಮತ್ತು ಬಿಳಿಯ ಕೂದಲು ನೋಡಿದರೆ ನಲವತ್ತು ವಯಸ್ಸಿನವನಂತೆ ಕಾಣುತ್ತಿರಲಿಲ್ಲವಾದ್ದರಿಂದ ಸ್ನೇಹಿತರಿಗೆ ಅನುಮಾನ ಬಂತು.
೫. ನಸಿರುದ್ದೀನನು ಬೀರುವಿನಲ್ಲಿ ಬಚ್ಚಿಟ್ಟುಕೊಂಡದ್ದು ಏಕೆಂದರೆ ಕಳ್ಳನಿಗೆ ಹೇಳಿದನು?
Answer
ಮನೆಯಲ್ಲಿ ಕದ್ದೊಯ್ಯಲು ಏನೂ ಸಿಗಲಿಲ್ಲವಾದ್ದರಿಂದ ನಾಚಿಕೆಯಾಗಿ ಮುಖ ತೋರಿಸಲಾರದೆ ಬೀರುವಿನಲ್ಲಿ ಬಚ್ಚಿಟ್ಟುಕೊಂಡಿದ್ದೇನೆ ಎಂದು ನಸಿರುದ್ದೀನನು ಕಳ್ಳನಿಗೆ ಹೇಳಿದನು.
೬. ನಸಿರುದ್ದೀನನು ತನ್ನ ಕತ್ತೆಯನ್ನು ಏಕೆ ಮಾರಿದನು?
Answer
ನಸಿರುದ್ದೀನನ ಕತ್ತೆ ತೀರಾ ಸೋಮಾರಿಯಾಗಿ ಏನುಮಾಡಿದರೂ ಬದಲಾಗದಿದ್ದುದರಿಂದ ಬೇಸತ್ತು ಅವನು ಅದನ್ನು ಮಾರಿದನು.
೭. ನಸಿರುದ್ದೀನನು ತನ್ನ ಕತ್ತೆಯನ್ನು ತಾನೇ ಕೊಂಡದ್ದು ಏಕೆ?
Answer
ಕತ್ತೆಯ ಗುಣಗಾನ ಕೇಳಿ ಅದು ಇಷ್ಟೆಲ್ಲಾ ಗುಣಗಳನ್ನು ಹೊಂದಿದೆಯೇ ಎಂದು ಆಶ್ಚರ್ಯವಾಗಿ, ಬೇರೆಯವರು ಕೊಂಡುಕೊಂಡಾರೆಂಬ ಆತಂಕದಿಂದ ನಸಿರುದ್ದೀನನು ತನ್ನ ಕತ್ತೆಯನ್ನು ತಾನೇ ಕೊಂಡನು.

ಆ) ಈ ಕೆಳಗಿನ ಪ್ರಶ್ನೆಗಳಿಗೆ ಎರಡು-ಮೂರು ವಾಕ್ಯಗಳಲ್ಲಿ ಉತ್ತರಿಸಿರಿ.

೧. ನಸಿರುದ್ದೀನನು ನೆರೆಯವನಿಗೆ ಕತ್ತೆ ಕೊಡಲು ನಿರಾಕರಿಸಿದ ಪ್ರಸಂಗವನ್ನು ವಿವರಿಸಿ.
Answer
ನೆರೆಯವನು ಸಾಮಾನು ಸಾಗಿಸಲು ಕತ್ತೆ ಕೇಳಿದಾಗ ನಸಿರುದ್ದೀನನು ತನ್ನ ಬಳಿ ಕತ್ತೆ ಇಲ್ಲ ಎಂದನು. ಆಗ ಮನೆಯಲ್ಲಿದ್ದ ಕತ್ತೆ ಜೋರಾಗಿ ಅರಚಿತು. ನೆರೆಯವನು ವ್ಯಂಗ್ಯವಾಗಿ ಹೇಳಿದಾಗ ನಸಿರುದ್ದೀನನು ದೊಡ್ಡಮನುಷ್ಯನ ಮಾತಿಗಿಂತ ಕತ್ತೆಯ ಮಾತಿನಲ್ಲಿ ನಂಬಿಕೆ ಹೆಚ್ಚೋ ಎಂದು ಕೋಪದಿಂದ ಕೇಳಿದನು.
೨. ನಸಿರುದ್ದೀನನು ತನ್ನ ವಯಸ್ಸಿನ ಬಗ್ಗೆ ಏನೆಂದು ಸಮರ್ಥನೆ ನೀಡಿದನು?
Answer
ಹತ್ತು ವರ್ಷದ ಹಿಂದೆಯೂ ತಾನು ನಲವತ್ತು ವರ್ಷ ಎಂದಿದ್ದೆ ಎಂದು ಆತ ಹೇಳಿದ. ತಾನು ಆಗೊಂದು ಈಗೊಂದು ಮಾತನಾಡುವವನಲ್ಲ, ನನ್ನದು ಯಾವಾಗಲೂ ಒಂದೇ ಮಾತು ಎಂದು ಸಮರ್ಥನೆ ನೀಡಿದನು.
೩. ಕಳ್ಳರು ನಸಿರುದ್ದೀನನ ಮನೆಗೆ ನುಗ್ಗಿದ ಪ್ರಸಂಗವನ್ನು ವಿವರಿಸಿ.
Answer
ಒಂದು ರಾತ್ರಿ ನಾಲ್ಕೈದು ಮಂದಿ ಕಳ್ಳರು ನಸಿರುದ್ದೀನನ ಮನೆಗೆ ನುಗ್ಗಿದರು. ದೂರದಿಂದ ಗಮನಿಸಿದ ನಸಿರುದ್ದೀನ್ ಬೀರುವಿನಲ್ಲಿ ಬಾಗಿಲು ಹಾಕಿಕೊಂಡು ಅಡಗಿಕೊಂಡನು. ಕಳ್ಳರು ಮನೆಯನ್ನೆಲ್ಲಾ ಜಾಲಾಡಿದರೂ ಏನೂ ಸಿಗದೆ, ಒಬ್ಬ ಕಳ್ಳ ಬೀರು ತೆರೆದಾಗ ನಸಿರುದ್ದೀನ್ ಅಲ್ಲಿ ಮುದುಡಿ ಕುಳಿತಿದ್ದನು.
೪. ಕತ್ತೆಯನ್ನು ಕೊಂಡವನು ಕತ್ತೆಯನ್ನು ಏನೆಂದು ಗುಣಗಾನ ಮಾಡಿದನು?
Answer
ಕತ್ತೆಯನ್ನು ಕೊಂಡವನು ಅದನ್ನು ಸಂತೆಯಲ್ಲಿ ಹರಾಜು ಹಾಕಿದನು. ಅವನು ಕತ್ತೆಯ ಕೆಲಸ ಮಾಡುವ ರೀತಿ, ಸಾಮರ್ಥ್ಯ, ಪರಂಪರೆ, ವಂಶಾವಳಿ ಮತ್ತು ಮುಂದೆ ಹಾಕುವ ಮರಿಗಳು ಇತ್ಯಾದಿ ಗುಣಗಳನ್ನು ವರ್ಣಿಸಿ ಗುಣಗಾನ ಮಾಡಿದನು.
೫. ನಸಿರುದ್ದೀನನು ತನ್ನ ಕತ್ತೆಯನ್ನು ತಾನೇ ಕೊಂಡುಕೊಂಡ ಪ್ರಸಂಗ ಯಾವುದು?
Answer
ನಸಿರುದ್ದೀನನು ಸೋಮಾರಿಯಾದ ಕತ್ತೆಯನ್ನು ನಲವತ್ತು ನಾಣ್ಯಗಳಿಗೆ ಮಾರಿದನು. ಕೊಂಡವನು ಅದನ್ನು ಸಂತೆಯಲ್ಲಿ ಹರಾಜು ಹಾಕಿ ಗುಣಗಾನ ಮಾಡಿದನು. ಆಶ್ಚರ್ಯ ಮತ್ತು ಆತಂಕದಿಂದ ನಸಿರುದ್ದೀನನು ತಾನೇ ಎಪ್ಪತ್ತು ನಾಣ್ಯಗಳಿಗೆ ಕೂಗಿ ಕತ್ತೆಯನ್ನು ಕೊಂಡುಕೊಂಡನು.

ಇ) ಕೆಳಗಿನ ಮಾತುಗಳನ್ನು ಯಾರು ಯಾರಿಗೆ ಹೇಳಿದರು?

೧. “ಇಲ್ಲ ಮಿತ್ರ, ಈಗ ನನ್ನ ಬಳಿ ಯಾವ ಕತ್ತೆಯೂ ಇಲ್ಲ.”
Answer
ನಸಿರುದ್ದೀನನು ನೆರೆಯವನಿಗೆ ಹೇಳಿದನು.
೨. “ನಾನು ಆಗೊಂದು ಈಗೊಂದು ಮಾತನಾಡುವವನಲ್ಲ.”
Answer
ನಸಿರುದ್ದೀನನು ಸ್ನೇಹಿತನಿಗೆ ಹೇಳಿದನು.
೩. “ಅರೇ! ಇಲ್ಲೇನು ಮಾಡುತ್ತಿದ್ದೀಯಾ?”
Answer
ಕಳ್ಳನು ನಸಿರುದ್ದೀನನಿಗೆ ಹೇಳಿದನು.

III. ಭಾಷಾಭ್ಯಾಸ :

ಅ) ಕೆಳಗಿನ ಪದಗಳಿಗೆ ವಿರುದ್ಧಾರ್ಥಕ ಪದಗಳನ್ನು ಬರೆಯಿರಿ.

೧. ಆತಂಕ X ___________
Answer
ಆತಂಕ X ನಿಶ್ಚಿಂತೆ
೨. ದೂರ X ___________
Answer
ದೂರ X ಹತ್ತಿರ
೩. ಧೈರ್ಯ X ___________
Answer
ಧೈರ್ಯ X ಭಯ
೪. ನಂಬಿಕೆ X ___________
Answer
ನಂಬಿಕೆ X ಅಪನಂಬಿಕೆ
೫. ರಾತ್ರಿ X ___________
Answer
ರಾತ್ರಿ X ಹಗಲು
೬. ಮಿತ್ರ X ___________
Answer
ಮಿತ್ರ X ಶತ್ರು
೭. ಸುಂದರ X ___________
Answer
ಸುಂದರ X ಕುರೂಪ
೮. ಹೊಗಳು X ___________
Answer
ಹೊಗಳು X ತೆಗಳು

ಆ) ಕೆಳಗಿನ ಪದಗಳನ್ನು ಸ್ವಂತ ವಾಕ್ಯಗಳಲ್ಲಿ ಬಳಸಿ ಬರೆಯಿರಿ.

೧. ಆತಂಕ : __________________________________________________________________
Model sentence
ಆತಂಕ: ಪರೀಕ್ಷೆಯ ಫಲಿತಾಂಶ ಬರುವವರೆಗೂ ನನಗೆ ಆತಂಕವಿತ್ತು.
೨. ನೆರೆಯವ : __________________________________________________________________
Model sentence
ನೆರೆಯವ: ನಮ್ಮ ನೆರೆಯವರು ನನಗೆ ಸಿಹಿ ಕೊಟ್ಟರು.
೩. ಖುಷಿ : __________________________________________________________________
Model sentence
ಖುಷಿ: ಗೆಳೆಯನೊಂದಿಗೆ ಆಟವಾಡಿದಾಗ ನನಗೆ ತುಂಬಾ ಖುಷಿಯಾಯಿತು.
೪. ನಾಚಿಕೆ : __________________________________________________________________
Model sentence
ನಾಚಿಕೆ: ತಪ್ಪು ಮಾಡಿದಾಗ ನನಗೆ ನಾಚಿಕೆಯಾಯಿತು.
೫. ಜಾಲಾಡು : __________________________________________________________________
Model sentence
ಜಾಲಾಡು: ನನ್ನ ಪೆನ್ಸಿಲ್ ಸಿಗದೆ ಶಾಲಾ ಚೀಲವನ್ನೆಲ್ಲಾ ಜಾಲಾಡಿದೆ.

ಇ) ಕೆಳಗಿನ ಪದಗಳನ್ನು ಬಿಡಿಸಿ ಬರೆಯಿರಿ.

೧. ವಯಸ್ಸೆಷ್ಟು = ___________ + ___________
Answer
ವಯಸ್ಸು + ಎಷ್ಟು
೨. ಆಗೊಂದು = ___________ + ___________
Answer
ಆಗ + ಒಂದು
೩. ನಾನಿಲ್ಲಿದ್ದೇನೆ = ___________ + ___________
Answer
ನಾನು + ಇಲ್ಲಿದ್ದೇನೆ
೪. ನಾಲ್ಕೈದು = ___________ + ___________
Answer
ನಾಲ್ಕು + ಐದು
೫. ಕದ್ದೊಯ್ಯಲು = ___________ + ___________
Answer
ಕದ್ದು + ಒಯ್ಯಲು

ಈ) ಕೆಳಗಿನ ಪದಗಳಿಗೆ ಸಮನಾರ್ಥಕ ಪದಗಳನ್ನು ಬರೆಯಿರಿ.

೧. ಖುಷಿ - ___________
Answer
ಖುಷಿ - ಸಂತೋಷ
೨. ಸ್ನೇಹಿತ - ___________
Answer
ಸ್ನೇಹಿತ - ಗೆಳೆಯ
೩. ಆತಂಕ - ___________
Answer
ಆತಂಕ - ಚಿಂತೆ

ಉ) ಕೆಳಗಿನ ವಾಕ್ಯಗಳಲ್ಲಿರುವ ಪದಗಳನ್ನು ಅರ್ಥಪೂರ್ಣವಾಗಿ ಜೋಡಿಸಿ ಬರೆಯಿರಿ.

೧. ನಂಬಲಿಲ್ಲ ಅವನ ಸ್ನೇಹಿತರು ಮಾತನ್ನು.
Answer
ಸ್ನೇಹಿತರು ಅವನ ಮಾತನ್ನು ನಂಬಲಿಲ್ಲ.
೨. ಕೂಗಿ ಅಂತ ನಾನಿಲ್ಲಿದ್ದೇನೆ ಹೇಳುತ್ತಿದೆಯಲ್ಲಾ ಕತ್ತೆ.
Answer
ಕತ್ತೆ ನಾನಿಲ್ಲಿದ್ದೇನೆ ಅಂತ ಕೂಗಿ ಹೇಳುತ್ತಿದೆಯಲ್ಲಾ.
೩. ಮಂದಿ ನಾಲ್ಕೈದು ಮನೆಗೆ ನಸಿರುದ್ದೀನನ ಕಳ್ಳರು ನುಗ್ಗಿದರು.
Answer
ನಾಲ್ಕೈದು ಮಂದಿ ಕಳ್ಳರು ನಸಿರುದ್ದೀನನ ಮನೆಗೆ ನುಗ್ಗಿದರು.
೪. ತೀರಾ ಕತ್ತೆ ನಸಿರುದ್ದೀನನ ಬರಬರುತ್ತಾ ಸೋಮಾರಿಯಾಗತೊಡಗಿತು.
Answer
ನಸಿರುದ್ದೀನನ ಕತ್ತೆ ಬರಬರುತ್ತಾ ತೀರಾ ಸೋಮಾರಿಯಾಗತೊಡಗಿತು.

IV. ಚಟುವಟಿಕೆಗಳು :

೧. ನಸಿರುದ್ದೀನನ ಇನ್ನಿತರ ಕತೆಗಳನ್ನು ಓದಿರಿ.
೨. ಇಲ್ಲಿರುವ ಕತೆಗಳನ್ನು ನಿಮ್ಮದೇ ದಾಟಿಯಲ್ಲಿ ಇತರರಿಗೆ ಹೇಳಿ ಸಂತೋಷ ಹಂಚಿಕೊಳ್ಳಿರಿ.
೩. ನಿಮ್ಮ ಅನುಭವಕ್ಕೆ ಬಂದ ಹಾಸ್ಯಮಯ ಪ್ರಸಂಗಗಳನ್ನು ಬರೆದು ಶಿಕ್ಷಕರ ಮಾರ್ಗದರ್ಶನ ಪಡೆಯಿರಿ.

Interactive Lab

← Go to the course page