Class 4 Kannada Lesson 18: Come See Srirangapatna | KTBS Second Language – Learn the Story

(ನಾಲ್ಕನೆಯ ತರಗತಿಯ ಮಕ್ಕಳು ಶಿಕ್ಷಕರೊಂದಿಗೆ ಪ್ರವಾಸಕ್ಕೆ ಹೊರಟರು.) **ಕಮಲ:** ಗುರುಗಳೇ, ಎಲ್ಲರೂ ಬಂದರು. ಹೊರಡೋಣವೆ? **ಶಿಕ್ಷಕರು:** ಮಕ್ಕಳೇ, ಇತ್ತ ಗಮನಿಸಿ. ಈಗ ನಾವು ಪ್ರವಾಸಿ ತಾಣ ಮಂಡ್ಯ ಜಿಲ್ಲೆಯ ಶ್ರೀರಂಗಪಟ್ಟಣಕ್ಕೆ ಹೋಗುತ್ತಿದ್ದೇವೆ. (ಶ್ರೀರಂಗಪಟ್ಟಣ ತಲುಪಿದ ನಂತರ ಮಕ್ಕಳೆಲ್ಲರೂ ಬಸ್ಸಿನಿಂದ ಇಳಿದು ಶಿಕ್ಷಕರೊಡನೆ ಸಾಲಾಗಿ ಹೊರಟರು.) **ಶಿಕ್ಷಕರು:** ರೀಟಾ, ಅಲ್ಲಿ ಕಾಣುತ್ತಿರುವ ಸೂಚನಾ ಫಲಕವನ್ನು ಓದು. **ರೀಟಾ:** ಆಗಲಿ ಗುರುಗಳೇ, ‘ಐತಿಹಾಸಿಕ ಪುರಾಣ ಪ್ರಸಿದ್ಧ ಶ್ರೀರಂಗಪಟ್ಟಣಕ್ಕೆ ಸುಸ್ವಾಗತ’ ಎಂದು ಬರೆದಿದೆ. **ಶಿಕ್ಷಕರು:** ಮಕ್ಕಳೇ, ಮುಂದೆ ಕಾಣುತ್ತಿರುವ ಕೋಟೆಯ ಹೆಬ್ಬಾಗಿಲಿನ ಮೂಲಕ ಊರೊಳಗೆ ಹೋಗೋಣ. **ಮೇರಿ:** ಗುರುಗಳೇ, ಈ ಕೋಟೆಯನ್ನು ಏಕೆ ಕಟ್ಟಿದ್ದಾರೆ? **ಶಿಕ್ಷಕರು:** ಹಿಂದೆ ಹಲವಾರು ರಾಜರು ಈ ಊರನ್ನು ಆಳುತ್ತಿದ್ದರು. ಊರನ್ನು ಶತ್ರುಗಳಿಂದ ರಕ್ಷಿಸಲು ಕೋಟೆಯನ್ನು ಕಟ್ಟಿದ್ದಾರೆ. **ರಹೀಮ:** ಗುರುಗಳೇ, ಅಲ್ಲಿ ನೋಡಿ, ಮಸೀದಿ ಕಾಣುತ್ತಿದೆ. **ಶಿಕ್ಷಕರು:** ರಹೀಮ, ಇದು ಟಿಪ್ಪು ಸುಲ್ತಾನ್ ತನ್ನ ಆಡಳಿತದ ಅವಧಿಯಲ್ಲಿ ನಿರ್ಮಿಸಿದ ಜಾಮಿಯಾ ಮಸೀದಿ. ಬನ್ನಿ ಮಕ್ಕಳೇ, ಇಲ್ಲಿರುವ ಮಾಹಿತಿ ಫಲಕವನ್ನು ಓದಿರಿ. (ಮಕ್ಕಳು ಓದುವರು. ಅಷ್ಟರಲ್ಲಿ......) **ಗೋವಿಂದ:** ಅಲ್ಲಿ ನೋಡಿ, ‘ಮದ್ದಿನ ಮನೆ’ ಎಂದು ನಾಮಫಲಕ ಹಾಕಿದ್ದಾರೆ ಗುರುಗಳೆ. **ಶಿಕ್ಷಕರು:** ಹೌದು, ಇದನ್ನು ಯುದ್ಧದ ಸಮಯದಲ್ಲಿ ಮದ್ದುಗುಂಡುಗಳನ್ನು ಸುರಕ್ಷಿತವಾಗಿ ಸಂಗ್ರಹಿಸಲು ಬಳಸುತ್ತಿದ್ದರು. **ಫಾತಿಮ:** ಅರೇ! ಇದೇನು! ಇಲ್ಲಿ ‘ಕಾರಾಗೃಹ’ ಎಂದು ನಾಮಫಲಕ ಹಾಕಿದ್ದಾರೆ. **ಶಿಕ್ಷಕರು:** ಇಲ್ಲಿ ನೋಡಿ, ಇದು ‘ಥಾಮಸ್ ಇನ್‌ಮನ್ ಕಾರಾಗೃಹ’. ಕೈದಿಗಳನ್ನು ಸೆರೆ ಇಡಲು ಹೈದರಾಲಿ ಮತ್ತು ಟಿಪ್ಪು ಸುಲ್ತಾನ್ ಇದನ್ನು ಬಳಸುತ್ತಿದ್ದರು. **ಪೀಟರ್:** ಅಲ್ಲೊಂದು ಮಾಹಿತಿ ಫಲಕ ಕಾಣುತ್ತಿದೆ. ಅದನ್ನು ಓದಲೇ ಗುರುಗಳೆ? **ಶಿಕ್ಷಕರು:** ಆಗಲಿ, ಓದು ಪೀಟರ್. **ಪೀಟರ್:** ಟಿಪ್ಪು ಸುಲ್ತಾನ್ ಮಡಿದ ಸ್ಥಳದ ಬಗ್ಗೆ ಮಾಹಿತಿ ಇದೆ ಗುರುಗಳೆ. **ಶಿಕ್ಷಕರು:** ಹೌದು, ಇದು ಕೊನೆಯ ಮೈಸೂರು ಯುದ್ಧದಲ್ಲಿ ಬ್ರಿಟಿಷರಿಂದ ಟಿಪ್ಪು ಸುಲ್ತಾನ್ ಮಡಿದ ಸ್ಮಾರಕ ಸ್ಥಳ. **ಗೌರಿ:** ಅಲ್ಲಿ ನೋಡಿ, ಯಾವುದೋ ಹಳೆಯ ಅರಮನೆಯ ಸ್ಥಳ ಕಾಣುತ್ತಿದೆ. **ರೇಷ್ಮೆ:** ಹೌದು, ಎಲ್ಲರೂ ಬನ್ನಿ, ಬನ್ನಿ. ಹಾಳಾಗಿರುವ ಈ ಅರಮನೆ ನೋಡಿ. **ಶಿಕ್ಷಕರು:** ಕೇಳಿ ಮಕ್ಕಳೇ, ಟಿಪ್ಪು ಸುಲ್ತಾನ್ ತನ್ನ ಆಡಳಿತದ ಕಾಲದಲ್ಲಿ ಈ ಲಾಲ್‌ಮಹಲ್ ಅರಮನೆಯಲ್ಲಿ ವಾಸವಾಗಿದ್ದನು. ಅನಂತರ ಬ್ರಿಟಿಷರಿಂದ ಈ ಅರಮನೆ ನಾಶವಾಯಿತು. ಇದರ ಇತಿಹಾಸವು ಈ ಫಲಕದಲ್ಲಿದೆ ಓದಿರಿ ಮಕ್ಕಳೆ. **ಗೀತ:** ಮುಂದೆ ದೇವಾಲಯ ಕಾಣುತ್ತಿದೆ. ಅಲ್ಲಿಗೆ ಹೋಗೋಣವೆ ಗುರುಗಳೆ? **ಶಿಕ್ಷಕರು:** ಆಗಲಿ, ಎಲ್ಲರೂ ಬನ್ನಿರಿ. ಇತಿಹಾಸ ಪ್ರಸಿದ್ಧವಾದ ಆದಿ ರಂಗನಾಥಸ್ವಾಮಿ ದೇವಾಲಯಕ್ಕೆ ಹೋಗೋಣ. (ಮಕ್ಕಳೆಲ್ಲರೂ ದೇವಾಲಯದ ಬಳಿಗೆ ಬಂದು ಬಾಗಿಲ ಬಳಿ ಇರುವ ಫಲಕದಲ್ಲಿರುವ ದೇವಾಲಯ ನಿರ್ಮಾಣದ ಇತಿಹಾಸವನ್ನು ತಿಳಿದುಕೊಂಡರು. ಅನಂತರ ದೇವರ ದರ್ಶನ ಪಡೆದರು.) **ಶಿಕ್ಷಕರು:** ಮಕ್ಕಳೇ, ಇಲ್ಲಿಯವರೆಗೆ ಶ್ರೀರಂಗಪಟ್ಟಣದ ಪ್ರಮುಖ ಸ್ಥಳಗಳನ್ನು ನೋಡಿದಿರಿ. ಇಲ್ಲಿ ನೋಡುವಂತಹ ಕರ್ನಲ್ ಬೈಲಿ ಕಾರಾಗೃಹ, ಬ್ರಿಟಿಷ್ ಸೈನಿಕರ ಸ್ಮಾರಕ, ಬೇಸಿಗೆ ಅರಮನೆ, ಚರ್ಚ್, ಗುಂಬಜ್, ನಿಮಿಷಾಂಬ ದೇವಾಲಯ, ನದಿಸಂಗಮ, ಘೋಸಾಯಿ ಘಾಟ್ ಮುಂತಾದ ಸ್ಥಳಗಳಿವೆ. ಸಂಜೆಯಾಯಿತು. ಮುಂದೊಂದು ದಿನ ಬರೋಣ. ನಡೆಯಿರಿ, ಬೇಗ ಊರು ಸೇರಿಕೊಳ್ಳೋಣ. **ಮಕ್ಕಳು:** ಆಗಲಿ ಗುರುಗಳೆ. (ಎಲ್ಲರೂ ಬಸ್ಸು ಹತ್ತಿ ಕುಳಿತರು, ಮಕ್ಕಳು ತಾವು ನೋಡಿದ ಸೂಚನಾ ಫಲಕ, ಮಾಹಿತಿ ಫಲಕಗಳಲ್ಲಿ ಓದಿದ ವಿಷಯದ ಬಗ್ಗೆ ಮಾತನಾಡಿಕೊಳ್ಳುತ್ತಾ ಊರು ತಲುಪಿದರು.) **ಕೌಶಲ :- ಓದುವುದು.** **ಸಾಮರ್ಥ್ಯ:- ಸೂಚನಾ ಫಲಕಗಳಲ್ಲಿನ ಸರಳ ಸೂಚನೆಗಳನ್ನು ಓದುವುದು.**